مەسعود بارزانی لەگەڵ تیمی وزاری پارتی كۆبووەوە و داوای لێكردوون، “پێویستە هەمووتان خۆتان بە خزمەتكاری گەلی كوردستان بزانن و دەبێت لە ناو چین و توێژەكانی كۆمەڵگە و خەڵكی هەژاری وڵاتدا بن”.
ئەمڕۆ شەممە 13ی ئازار، مەسعود بارزانی، سەرۆكی پارتی دیموكراتی كوردستان لە سەلاحەدین، لەگەڵ سەرۆكی حكومەتی هەرێمی كوردستان و تیمی پارتی لە حكومەتی هەرێمی كوردستان كۆبووەوە.
بارەگای بارزانی لەبارەی كۆبوونەوەكەوە ڕاگەیەندراوێكی بڵاوكردووەتەوە و ئاماژەی بەوەكردووە، “لە كۆبوونەكەدا سەرەتا مەسرور بارزانی، سەرۆكی حكومەتی كوردستان كورتەیەكی لەبارەی كار و بەرنامەكانی حكومەت و هەنگاوەكانی پڕۆسەی چاكسازی لە بواری كەرتی نەوت و پێشمەرگە و بوارە جیاجیاكانی تر و هەنگاوەكان بۆ زیادكردنی داهاتی حكومەت و پێشكەشكردنی خزمەتگوزاری بۆ هاوڵاتیان خستەڕوو”.
ئەوەش خراوەتەڕوو، “مەسرور بارزانی جەختیشی لەوە كردەوە كە كابینەی حكومەتی هەرێم وەك تیمێكی هەماهەنگ و پتەو و بە بێ جیاوازیی نێوان لایەنە پێكهێنەرەكانی كاروبارەكانی خۆی بەڕێوە دەبات و هەوڵی ئەوەش دەدات كە بۆ دابینكردنی داهات و خزمەتكردنی خەڵك پشت بە خۆی و تواناكانی هەرێم ببەستێت”.
لەو كۆبوونەوەیەدا مەسعود بارزانی دەستخۆشی لە تیمەكەی پارتی لە حكومەت كردووە و ڕاگەیاندووە، “پێویستە هەمووتان خۆتان بە خزمەتكاری گەلی كوردستان بزانن و دەبێت لەناو چین و توێژەكانی كۆمەڵگە و خەڵكی هەژاری وڵاتدا بن و هەموو هەوڵەكان لە دەوری ئەوەدا چڕ ببێتەوە كە دەستەڵات بە دروستی و بۆ خزمەتی جەماوەر بە كار بهێندرێن”.
بارزانی ئاماژەی بەوشكردووە، “ڕێبازی بارزانی ڕێبازی خزمەتكردنی خەڵكە و پێویستە خەڵكی كوردستان كەرامەتی خۆی لە حكومەتەكەی خۆیدا ببیننەوە”.
“لە بەشێكی دیكەی قسەكانیدا، مەسعود بارزانی، پشتیوانیی خۆی بۆ حكومەتی هەرێم دووپات كردەوە و داوای كرد كە حكومەت بە پێداگری و هێزەوە لەسەر پڕۆسەی چاكسازی بەردەوام بێت و ئامادەیی خۆشی ڕاگەیاند كە بۆ سەرخستنی پڕۆسەی چاكسازی ئەوەی پێویست بێت یارمەتیدەری حكومەتی هەرێم دەبێت”، وەك لە ڕاگەیەندراوەكەی بارەگای بارزانیدا هاتووە.
