لەلایەن چەكدارێكەوە تەقە لە شوێنی مانەوە و ئۆتۆمبێلی بەرپرسێكی حكومی لە دەربەندیخان دەكرێت.
سلێمان سەعید، قائیمقامی دەربەندیخان بە تۆڕی میدیایی ئێستای راگەیاند، پاش نیوەڕۆی ئەمڕۆ كەسێك كە پێشتر زیادەڕەویی كردبووەسەر زەوییەكی بەڕێوەبەرایەتیی بەنداوی دەربەندیخان و زیادەڕەوییەكەی لابراوە، چووەتەسەر شوێنی مانەوەی عوسمان عەبدوڵا سەرۆكی شارەوانیی دەربەندیخان.
وتیشی، “تۆمەتبار تەقەی كردووە و هەشت تا 10 فیشەكی بە ماڵ و ئۆتۆمبێلی سەرۆكی شارەوانییەوە ناوە”.
قائیمقامی قەزاكە ئەوەشی خستەڕوو، تۆمەتبار ناسراوە و هێزە ئەمنییەكان لە هەوڵی دەستگیركردنیدان.
