سەرۆکی یەکێتی تۆپی پێی کوردستان، سەفین کانەبی لە کۆنگرەیەکی ڕۆژنامەوانیدا دەستلەکارکێشانەوەی لە پۆستەکەی ڕاگەیاند و وتی، ” بڕیارەکە کۆتاییە و پاشگەزبوونەوەی تێدا نییە”.
سەرۆکی یەکێتی تۆپی پێی کوردستان، ئەمڕۆ سێشەممە کۆنگرەیەکی ڕۆژنامەوانی ئەنجامدا و دەستلەکارکێشانەوەی خۆیی و سەلام حسێنی سکرتێر و سێ ئەندامی دیکەشی ڕاگەیاند.
لەم بارەیەوە بە میدیاکانی ڕاگەیاند، ” نزیکەی 17 ساڵە لە یەکێتی تۆپی پێی کوردستان کاردەکەین، هەوراز و نشێوی زۆرمان تێپەڕاندووە، زەحمەتمان کێشاوە و شانازیش بە کارەکانمانەوە دەکەین، تاوەکو ئەم ساتە شەش تاوەکو حەوتجار دەستلەکارکێشانەوەمان پێشکەشکردووە، بەڵام قبوڵنەکراوە”.
کانەبی هۆکاری وازهێنانی بە هۆکاری تایبەت وەسفدەکات و دەڵێت، ” کاتێک یەکێتی تۆپی پێی کوردستان بەجێدەهێڵێن، بڕی 509 ملیۆن دینار لە خەزێنەی یەکێتیەکەدایە، ڕادەستی ئەو کەسانەی دەکەین کە جێگەمان دەگرنەوە”.
سەرۆکی پێشووی یەکێتی تۆپی پێی کوردستان، کانەبی ڕوونکردنەوەی زیاتر دەدات و دەڵێت، ” ڕەنگە بڕوام پێنەکەن، بەڵام بەهۆی کارەکانی تۆپی پێی کوردستانەوە چوار مامم هەیە ماڵی هیچ یەکێکیان نازانم”.
مەبەست لە لێدوانەکانیشی ئەوەبوو، کە بەهۆی کارە وەرزشیەکانەوە لە ژیانی تایبەتیی دابڕاوە و هەر بەم هۆیەشەوە دەستی لە پۆستەکەی کێشاوەتەوە.
سەفین کانەبی لە ساڵی 2006 و سەرەتای بونیادنانی یەکێتی تۆپی پێی کوردستانەوە پۆستی سەرۆکی وەرگرتووە و ماوەی 15 ساڵ لەسەر ئەرکەکەی بەردەوامبووە.
