پاش زیاتر لە دوو ساڵ دەرچوون لێی، ویلایەتە یەكگرتووەكانی ئەمریكا سووربوونی خۆی لەسەر گەڕانەوەی بۆ ئەنجومەنی مافەكانی مرۆڤ-ی سەر بە نەتەوەیەكگرتووەكان نیشاندەدات.
پێشتر ئیدارەی دۆناڵد ترەمپ، سەرۆكی پێشووی ئەمریكا لە ساڵی 2018 وازهێنانی لە كورسییەكەی لە ئەنجومەنەكە ڕاگەیاند، پاش تۆمەتباركردنی بە دووڕوویی و لایەنداری لە دژی ئیسرائیل.
ئەنتۆنی بلینكن، وەزیری دەرەوەی ئەمریكا لە بەیاننامەیەكدا ڕایگەیاند، سەرۆك ڕێنمایی داوەتە وەزارەتی دەرەوە بۆ بەشداری “خێرا و بەهێزانە” لە ئەنجومەنی مافەكانی مرۆڤ.
بلینكن ئەوەشی وت، “دەزانین ئەنجومەنی مافەكانی مرۆڤ دەستەیەكی پڕ كەموكوڕییە و پێویست بە هەمواری بەرنامەكەی و ئەندامەكانی و كارە لەپێشینەكانی دەكات”.
ئاماژەشیدا، بۆ ئەوەی توانای مامەڵەت لەگەڵ كەموكوڕییەكانی ئەنجومەنەكەدا هەبێت لەگەڵ جەختكردنەوە لە وەفاداری بە پابەندییەكانی، پێویستە ویلایەتە یەكگرتووەمان بوونی دەبێت و تەواوی قورسایی و پێشەنگی خۆی لە دیپلۆماسیەتدا تیا بەكاربهێنێت.
مادەیەكی بەردەوام لە خستەی كارەكانی ئەنجومەنەكەدایە، كە لە ساڵی 2006 دامەزرا، دەربارەی ئەو پێشێلكارییانەی گوماندەكرێت ئیسرائیل لە خاكی فەڵەستیندا ئەنجامیان دەدات، واشنتن-یش بەردەوام هەوڵیداوە ئەو مادەیە لاببرێت.
س: DW
