کۆنۆر ماکگریگۆری ئێرلەندی پاڵەوانی پێشووی بواری (UFC) ساڵی داهاتوو لە کەنداوی عەرەبی ڕوبەڕوی مانی پاکیاوی ئەفسانەی بۆکسێن دەبێتەوە.
ماکگریگۆری ئێرلەندی ناسراو بە جەنگاوەرە سەرکێشەکە، لەماوەی ڕابردوودا و دوای شکستی بەرانبەر خابیب نۆرماگیدۆڤی ڕووسی وازهێنانی یەکجارەکی ڕاگەیاند و دوورکەوتەوە، بەڵام پاش ماوەیەک لە بڕیارەکەی پەشیمانبووەوە و گەڕایەوە بۆ ململانێکانی (UFC).
وەک ئاشکرایە کۆنۆر لە تۆڕی کۆمەڵایەتی تویتەر زۆر کارایە، لەنوێترین پۆستدا نوسیویەتی، ” لە کەنداوی عەرەبی دابەزین بەرانبەر مانی پاکیاو ئەنجامدەدەم”.
هەروەها نوسیویەتی، ” شانازییەکی گەورەیە بۆم کە لە ژیانی وەرزشییمدا ڕوبەڕوی دوو پاڵەوان و ئەفسانەی بواری بۆکسێنی سەردەمی نوێ دەبمەوە”.
ماکگریگۆر لە 26ی ئابی 2017لە یاریگای بۆکسێندا و بە شێوازی بۆکسێن ڕوبەڕوی فلۆید مایوێزەری ئەفسانە و پاڵەوانی مێژوویی کێشی قورس بووەوە، بەڵام شکستیهێنا، بەهەمان شێوە پشتوێنی پاڵەوانی (UFC)یشی بۆ خابیب لەدەستدا و ملیۆنان دۆلار قازانجی دارایی بەرکەوت کە بە (30) ملیۆن دۆلار مەزەندە دەکرا.
لە ڕابردوودا جەنگاوەرە ئێرلەندییەکە زۆری هەوڵدا دووبارە ڕوبەڕوی خابیب و مایوێزەر ببێتەوە، بەڵام لە هەوڵەکانیدا سەرکەوتونەبوو، لە ئێستادا و بە ڕوبەڕوبوونەوەی پاکیاو دەیەوێت دووبارە بگەڕێتەوە نێو چوارچێوەی گرنگیپێدان و لەهەمان کاتدا پارەیەکی خەیاڵی دەستبخات.
