ڕێکخراوی لێبوردنی نێودەوڵەتی و ڕێکخراوەکانی مافی مرۆڤ لە ڕۆژهەڵاتی کوردستان داوای ئازادکردنی نزیکەی 100 کورد دەکەن لە زیندانەکانی کۆماری ئیسلامیی ئێراندا.
کەسوکاری دەستگیراوانی کورد لە ڕۆژهەڵاتی کوردستان ڕایدەگەیەنن هێزە ئەمنییەکانی ئێران تەنها یەکجار ڕێگەیانداون بە تەلەفۆن پەیوەندی بە کەسە گیراوەکانیانەوە بکەن و ئیتر چارەنوسیان نادیارە.
هێزە ئەمنییەکانی ئێران لە مانگی ڕابردوودا لەماوەی تەنها یەک هەفتەدا 94 کوردیان لە شارەکانی ڕۆژهەڵاتی کوردستان دەستگیرکردووە و دەستگیرکراوان چالاکی ژینگەیی و مەدەنین.
ڕێکخراوی لێبوردنی نێودەوڵەتی و ڕێکخراوەکانی مافەکانی مرۆڤ لە ڕۆژهەڵاتی کوردستان لە نامەیەکدا سەبارەت بە دەستگیراوەکان دەڵێن، “بەپێی زانیاریییەکان هێزە ئەمنییەکانی ئێران 88 پیاو و 8 ژنیان دەستگیرکردووە کە هیچیان چالاکی سیاسییان نەبووە و تەنها چالاکی مەدەنی و کرێکاری و ژینگەیی بوون”.
بەپێی نامەی ڕێکخراوەکان، “ئەو کەسانەی دەستگیرکراون لەژێر ئەشکەنجەدان و هێزە ئەمنییەکان دەیانەوێت لە ڕێگەی فشاری دەرونی و جەستەییەوە دان بە هەندێک تۆمەتدا بنێن کە ئەوان ڕۆڵیان نەبووە تێیدا”.
نامەی ڕێکخراوەکان ئاشکرایکردووە، هێزە ئەمنییەکان هەڕەشەیان لە کەسوکاری دەستگیرکراوەکان کردووە کە بە هیچ شێوازێک قسە بۆ میدیا جیهانییەکان و ڕێکخراوەکان نەکەن.
