وتەبێژی شارەوانیی سلێمانی ڕایدەگەیەنێت، بەردەوامدەبن لە هەڵمەتی چڕ و فراوانی چاکسازی لە شەقامەکانی سلێمانی تا ئەوکاتەی کەم و کوڕی هەبێت.
ئەنجومەن حسێن، وتەبێژی شارەوانیی سلێمانی بە تۆڕی میدیایی ئێستای ڕاگەیاند، گەیشتووینەتە وەرزی گەرما و دەستمان بە هەڵمەتێکی فراوان و چڕی چاکسازیی شەقامەکان کردووە، کە تەنیا لە چاککردنەوەی چاڵ و چۆڵییەکاندا خۆی نابینێتەوە و چاککردنەوەی چینی خراپبووی شەقامەکان و دووبارە قیرتاوکردنەوەیشیان، دەگرێتەوە.
وتیشی، پڕۆژەی کۆنکرێتکردنی کۆڵانەکانیش بەردەوامە و تاوەکو ئێستا نزیکەی سێ هەزار مەتر سێجا کۆنکرێت بۆ چەند گەڕەکێکی سلێمانی ئەنجامدراوە.
بە وتەی ئەنجومەن حسێن، چاکسازیی شەقامەکان تا ئەم ساتە، ئەم شوێنانەی گرتووەتەوە:
– شەقامی بازنەیی مەلیک مەحمود (گوندی ئەڵمانی تا گۆیژە سیتی).
– لە بەرزە پردی حەپسەخانی نەقیبەوە تا تەلاری هونەر.
– چوارڕیانی قەرەداغ – عەربەت بە ئاراستەی پردی وڵووبە.
– چوارڕیانی هەواری شار.
– پارکی ئازادی بە ئاراستەی هۆڵی تەوار.
– شەقامی ئەمنە سوورەکە بۆ گەڕەکی کانێسکان.
– بانکی ناوەندیی هەرێم لە سلێمانی تا شەقامی سالم.
– بەشێکی گەڕەکی ئیبراهیم ئەحمەد.
– شەقامی نزیک پارکی ماردین.
– شەقامی چوارڕیانی دەستاڕەکە، بە ئاراستەی تێرمیناڵی شارەزوور تا دەگاتەوە بە بازنەیی مەلیک مەحمود.
