ئەمشەو، شەممە لە چوارچێوەی ڕوبەڕوبوونەوەکانی هەفتەی 21ی خولی پلە یەکی ئیسپانیا، یانەی ڕیاڵ مەدرید دۆڕاندنێکی چاوەڕواننەکراوی بەرانبەر لیڤانتی تۆمارکرد.
ڕیاڵ مەدرید لە یاریگای دی ستیفانۆ میوانداری لیڤانتی کرد و یاری نێوانیان بە بردنەوەی یانەی میوان بە ئەنجامی دوو گۆڵ بەرانبەر گۆڵێک کۆتاییهات.
لە سەرەتاکانی تایمی یەکەم ئەستێرەکانی مێرەنگی گوشاری توندیان دروستکرد و چەندین هەلی مەترسیداریان ڕەخساند، لە خولەکی هەشت ئیدێر میلیتاو بە کارتی سوور لە یاریگا کرایە دەرەوە، لەگەڵ ئەوەشدا مارکۆ ئاسینسیۆ لە خولەکی 13 گۆڵێکی ناوازەی تۆمارکرد، لە خولەکی 32 خوسێ لویس مۆرایس ئەنجامەکەی یەکسانکردەوە و ئەو تایمە (1-1) کۆتاییهات.
لە تایمی دووەمدا یاریزانانی لیڤانتی بەهۆی زیادی ژمارەیانەوە باڵادەستیان نیشاندا، لە خولەکی 78 ڕۆجەر مارتی گۆڵی دووەم و فراوانکەری ئەنجامەکەی تۆمارکرد.
https://streamable.com/5644m8
سەرەڕای ئەوەی لە کۆتا ساتەکاندا یاریزانانی لۆس بلانکۆس هەوڵی بێوچانیاندا بۆ تۆمارکردنی گۆڵی یەکسانکەرەوەی ئەنجامەکە، بەڵام سەرکەوتوو نەبوون و ڕوبەڕوبوونەوەکە (1-2) لە بەرژەوەندی لیڤانتی کۆتاییهات.
بەپێی ئەنجامە تۆمارکراوەکە، ڕیاڵ مەدرید بە (40) خاڵەوە لە پلەی دووەمی ڕیزبەندی یانەکانی لالیگا هاوشێوەی هەفتەکانی ڕابردوو بەردەوامبوو، بەڵام جیاوازییان لەگەڵ یانەکانی ئیشبیلیە بۆ یەک خاڵ و بەرشلۆنە بۆ سێ خاڵ کەمبووەوە.
