کۆمسیۆنی باڵای هەڵبژاردنەکانی عێراق، ئەمڕۆ پێنجشەممە 28ی کانونی دووەم ئاشکرایکرد نوێنەرانی وڵاتان بۆ سەرپەرشتیی هەڵبژاردنەکان بانگهێشتکراون نەک بۆ چاودێریکردن.
جەلیل عەدنان، سەرۆکی ئەنجومەنی کۆمسیۆن لە کۆمسیۆنی باڵای هەڵبژاردنەکانی عێراق لە کۆنگرەیەکی ڕۆژنامەوانیدا ڕایگەیاند، “عێراق داوای سەرپەرشتیکردنی هەڵبژاردنەکانی لە کۆمەڵگای نێودەوڵەتی کردووە نەک چاودێریکردن ئەمدوانە جیاوازییان هەیە”.
وتیشی، “هەڵبژاردنەکان ئاڵنگارییەکی گەورەیە لە بارودۆخێکی نالەباردا”.
ئاماژەی بەوەشکردووە، “دابەشکردنی عێراق بەسەر بازنەی هەڵبژاردنەکاندا، بۆ دۆخی ئێستا ئاسانتر و گونجاوترە”.
هەروەها راشیگەیاند کە ماوەی تۆمارکردنی هاوپەیمانێتییە سیاسییەکان و کوتلەکانمان درێژکردووەتەوە بۆ هەر لایەنێک کە دەیەوێت بەشداریی هەڵبژاردنەکان بکات.
جەختیشیکردەوە کە نوسینگەکانیان دەرگایان کراوەدەبێت بۆ تۆمارکردنی کوتلەکان و پێدانی زانیاری لەسەر بەڕێوەچوونی هەڵبژاردنەکان وەکچۆن داواشی لە ڕاگەیاندنەکان کرد کە ڕۆڵیان هەبێت لە سەرکەوتنی پرۆسەکەدا.
ئاسکراشیکرد، “کۆمسیۆنی هەڵبژاردنەکان لە پەیوەندی و هەماهەنگی بەردەوامدایە لەگەڵ وەزارەتی دەرەوەی عێراق بۆ پێشکەشکردنی هەر پێداویستییەک سەبارەت بە دەنگدەرانی دەرەوەی وڵات”.
