ئەمشەو، یەکشەممە لە چوارچێوەی ڕوبەڕوبوونەوەکانی هەفتەی 20ی خولی پلە یەکی ئیسپانیا، یانەی بەرشلۆنە بردنەوەی بەرانبەر ئیڵچی تۆمارکرد.
بەرشلۆنە بەبێ بەشداری لیۆ مێسی لە یاریگای مانوێل مارتینێز ڤالێرۆ بووە میلانی ئیڵچی و یاری نێوانیان بە بردنەوەی کەتەلۆنیەکان بە ئەنجامی (2-0) کۆتاییهات.
لە سەرەتاکانی تایمی یەکەم ئەستێرەکانی بارسا گوشاری توندیان دروستکرد و چەندین هەلی مەترسیداریان ڕەخساند، لە خولەکی 39 فرینکی دی یۆنگ گۆڵێکی ناوازەی تۆمارکرد و ئەو تایمە بە گۆڵێکی بێوەڵام کۆتاییهات.
لە تایمی دووەمدا ئەستێرەکانی کومان هێرشەکانیان چڕتر کرد، لە خولەکی 89 ڕیکی پوج گۆڵی دووەم و فراوانکەری ئەنجامەکەی تۆمارکرد.
سەرەڕای ئەوەی لە کۆتا ساتەکاندا یاریزانانی ئیڵچی هەوڵی بێوچانیاندا بۆ هاوتاکردنەوەی ئەنجامەکە، بەڵام سەرکەوتوو نەبوون و یارییەکە بە ئەنجامی دوو گۆڵی بێوەڵام کۆتاییهات.
بەپێی ئەنجامە تۆمارکراوەکە، بەرشلۆنە بە کۆکردنەوەی (37) خاڵ لە پلەی سێیەمی ڕیزبەندی یانەکانی لالیگا جێگیربوو.
