لەگەڵ پەرەسەندنی رووداوەکانی سوریا لەماوەی رابردوودا، یەکێک لەو کەمایەتییانەی زۆر ناویان دەبرێت لە سوریا دورزییەکانن.
لەم هەفتەیەدا، ئیسرائیل چەند جارێک پێداگری کردووە کە پێویستە لە سوریای نوێدا مافی کورد و دورزییەکان پارێزراوبێت و نابێت بێبەشبکرێن.
دورزییەکان کێن؟
ئەم کەمایەتییە ئاینییە، مێژووی سەرهەڵدانیان دەگەڕێتەوە بۆ سەرەتای سەدەی 11 و لە دامەزرێنەرى ئاینى دورزى و یەکەم بانگخوازى ئەو ئاینە خەلیفەى فاتیمیەکان حاکم بیئەمرالله بووە و بە زۆر ناوچەى جیهاندا بڵاووبووە و هەر کەسێک چووبێتە سەر ئەو ئاینە ناوى خۆى تۆمارکردووە و پەیمانێکى لەگەڵ خۆى بەستووە و دواتر بانگخوازى بۆ ئەو ئاینە داخرا و رێگە بەهیچ کەسێکى دیکە نەدرا بچێتە ناو ئەو ئاینەوە، تەنها ئەوانە نەبن کە باوک و دایکیان دورزی بوون.
چەندین جیاوازیی دیکەیان هەیە لەگەڵ ئاینی ئیسلام، بەڵام ئەوەی سەرچاوە مێژوویەکان باسی دەکەن، لە ئیسلامی شیعە مەزهەبی ئیسماعیلییەوە پەرەیان سەندووە و تێکەڵەیەکن لە بیڕوباوەڕی ئیسلامی و هیندۆسی و فەلسەفە کۆنەکانی یۆنان.
دورزییەکان لە ناوچەکانی رۆژهەڵاتی ناوەڕاست دەژین، لەوانە، سوریا، لوبنان، ئوردن، ئیسرائیل و بەرزاییەکانی گۆلان و ژمارەیان نزیکەی یەک ملیۆن کەس دەبێت.
لە کەسایەتییە سیاسییە دیارەکانی دورزییەکان لە سەردەمی ئەمڕۆدا وەلید جونبلاتی لوبنانییە، دامەزرێنەری حیزبی پێشکەوتنخوازی سۆسیالستی لوبنان.
بیروباوەڕی ئەم کەسانە بیروباوەڕێکی روون نییە بۆ خەڵکی دەرەوەی بازنەکەیان، بەهۆی ئەوەی ئاشکرایان نەکردووە، بەڵکو هەوڵیانداوە بە پارێزراوی بیروباوەڕەکەیان بهێڵنەوە.
ئەوەی جێگەی سەرنجە، ئەم گرووپە، شێخیان هەیە و گوێی بۆ دەگرن، لە هەموو ئەو وڵاتانەی بوونیان هەیە گروپی تایبەت بە خۆیان هەیە و تێکەڵبوونیان لەگەڵ سیاسەت هەیە و خۆپیشاندان دەکەن لە دژی هەر بڕیارێک بزانن دەیانەوێت بە هاوڵاتیی پلە دوو یان جیاواز سەیریان بکەن.
خاکی ئەم کەمایەتییە ئاینیە بەرزاییە سەرنجڕاکێشەکانی گولانە کە دەکەوێتە نێوان سوریا و ئیسرائیلەوە و ناوچەیەکی کێشە لەسەر و شوێنی جەنگ و پەلاماردانی زۆر بووە لە رابردوو و ئەمڕۆشدا.
