پیاوێك بەشێك لە ماڵەكەی لە فەڕەنسا تەقاندەوە لەكاتی هەوڵدانیدا بۆ ڕاونانی مێشێك، وەك ئەوەی سایتی Sud-Ouest بڵاویكردوەتەوە.
پیاوەكە، كە لە هەشتاكانی تەمەنیدایە، سەرگەرمی خواردنی نانی ئێوارە بووە كاتێك مێشێك لە دەوری بووە و بێزاری كردووە.
بۆیە مێشكوژێكی كارەبایی بەكارهێناوە و شوێنی كەوتووە، لەوكاتەشدا غازی ماڵەكەی، كە دەكەوێتە هەرێمی دوردونی باشوری ڕۆژئاوای فەڕەنسا، دزەی كردووە.
كارلێكی نێوان بكوژە كارەباییەكە و غازەكە بووەتە هۆی تەقینەوەیەك و ڕووخانی چێشتخانە و زیانگەیاندن بە سەقفی خانووەكەی.
بەپێی میدیاكانی ئەو وڵاتە، پیاوەكە لە ڕووداوەكە دەرباز بووە و تەنها دەستی سوتاوە.
لەگەڵ ئەوەشدا چارەنووسی مێشەكە نەزانراوە.
لەپاش ڕووداوەكەش پیاوەكە لە خانەیەكی كاتیدا تۆماركراوە و كەسوكارەكەشی دەستیان بە نۆژەنكردنەوەی خانووەكەی كردووە.
