دوای ئەوەی مۆزێکی بە بەهای 6.2 ملیۆن دۆلار کڕی و لە بەرچاوی هەموو جیهاندا خواردی، جەستن سەن ملیاردێرە گەنجەکە، جارێکی دیكە سەرنجەکانی بەلای خۆیدا راکێشایەوە، دوای وەبەرهێنانی 30 ملیۆن دۆلار لە پرۆژەیەکی هاوبەشی دۆناڵد ترامپدا.
میدیا جیهانییەکان رایانگەیاند، جەستن سەن بە بڕی 30 ملیۆن دۆلار لە پرۆژەیەکی وەبەرهێنان بەشداریکردووە بەناوی بازاڕی دارایی ئازاد، کە خاوەندارێتی دەگەڕێتەوە بۆ کۆمەڵێک سەرمایەدار لەنێویشیاندا دۆناڵد ترامپ سەرۆکی هەڵبژێردراوی ئەمریکا، ئەمەش دووبارە ناوی سەرمایەدارە گەنجەکەی هێناوەتەوە سەر مانشێتی هەواڵە جیهانییەکان و سەرنجی زۆربەی خەڵکی بەلای خۆیدا راکێشاوە.
پسپۆڕانی ئابوری دەڵێن، ئامانج لەم هەنگاوانەی سەن، تەنها دەرخستنی ناوەکەیەتی لەگەڵ ناوی کەسایەتییە ناسراوەکانی جیهاندا و، ناوبراو حەزێکی زۆری بۆ بەناوبانگبوون هەیە.
جەستن سەن-ی تەمەن 34 ساڵ، بەڕەگەز چینییە و بازرگانی دراوە ئەلیکترۆنییەکانە، سەرمایەکەی بە یەک ملیار و 400 ملیۆن دۆلاری ئەمریکی دەخەمڵێندرێت، لەماوەی رابردوودا بووە ناوێکی ناسراو دوای ئەوەی لە پێشانگایەکی هونەریدا مۆزێکی بە 6.2 ملیۆن دۆلار کڕی و پاشان خواردی.
