وەزارەتی پلاندانانی هەرێم داوا لە هاوڵاتییان دەکات هاوشێوەی قۆناغی دووەم بەشداری لە قۆناغی سێیەمی سەرژمێریدا بکەن.
وەزارەتی پلاندانانی هەرێم لە راگەیەندراوێکدا بڵاویکردەوە، ” له ماوه‌ى ته‌نها 14 ڕۆژدا سه‌ره‌ڕاى بوونى ده‌يان ئاسته‌نگى ته‌كنيكى و كێشه‌ى مه‌يدانى توانرا قۆناغی دووەمی سەرژمێری بەسەرکەوتووی جێبەجێبکرێت”.
ئاماژەی بەوەشکرد، هاوڵاتيیانى ناوچه‌كانى مادده‌ى 140 وێنه‌يه‌كى جوان و پر مانايان نيشاندا كاتێک به هه‌زاران خێزان گه‌ڕانه‌وه زێدى خۆيان بۆ به‌شداريكردن له سه‌رژمێرى له شه‌نگال ، مەخمور، كه‌ركوك و خانه‌قين و ناوچه‌كانى دیکە و كوردستانیبوونى ئه‌و ناوچانه‌یان دووپاتكرده‌وه.
داوایشیکرد، به كردار بۆ ته‌واوكردنى ئه‌و ماندووبوون و زه‌حمه‌ته‌ى كێشرا له‌لايه‌ن هاوڵاتیيان به‌هه‌مان شێوه به‌شدارى بكه‌ن له قۆناغى پڕكردنه‌وه‌ى فۆرمى سه‌رژمێرى، چونكه قۆناغى رابردوو ته‌نها ژماره‌ى خێزان و ئه‌ندامانى نيشانده‌دات له‌گه‌ڵ چه‌ند زانيارييه‌كى دیکەی به‌سوود، به‌ڵام بۆ ئه‌وه‌ى سوودى ته‌واو وه‌ربگيرێت له‌و پڕۆسه گه‌وره‌يه پێويسته فۆڕمى ووردى سه‌رژمێرى پڕ بكرێته‌وه، تاوەكو بتوانين بارودۆخى ئابوورى و كۆمه‌ڵايه‌تى و په‌روه‌رده‌يى و ته‌ندروستى و ديموگرافى و بواره‌كانى تر بزانين، له‌ئه‌نجامدا سوودى يه‌كجار گه‌وره‌ى ده‌بێ بۆ هاوڵاتیيان له رووى دابينكردنى خزمه‌تگوزارييه سه‌ره‌تاييه‌كان و دانانى پلانى پته‌و بۆ جێبه‌جێكردنى پڕۆژه‌كانى خزمه‌تگوزارى.
سەبارەت بە هاوڵاتییانی سنووری ماددەی 140 داوایکرد، ئاماده‌بن بۆ ئه‌و قۆناغه، چونكه زۆر گرنگه بۆيان و بۆمان تاوەكو بتوانين خاڵى سه‌ره‌كى رێكه‌وتنمان له‌گه‌ڵ حكومه‌تى فيدراڵ جێبه‌جێبكه‌ين سه‌باره‌ت به له‌يه‌ك به‌ستنى (مقاطعة) داتاكانى سه‌رژمێرى (2024) له‌گه‌ڵ سه‌رژمێرى ساڵى (1957) و دروستكردنى تۆمارى ناوچه‌كانى مادده‌ى 140 كه ده‌بێته بنه‌ماى جياكردنه‌وه‌ى خه‌ڵكى ره‌سه‌ن له‌گه‌ڵ هاتوو و خه‌ڵكى دیکە، بۆيه بوونى ئه‌ندامێكى خێزان له‌و ناوچانه بۆ پڕكردنه‌وه‌ى ئه‌و فۆڕمه يه‌كجار گرنگه.
