ئەندامێكی ئەنجومەنی نوێنەرانی عێراق رایدەگەیەنێت، بەپێی بەدواداچوونەكان تا ئێستا بەغداد رەزامەند نەبووە مووچەی مانگەكانی تەمموز و ئابی ئەمساڵی فەرمانبەرانی هەرێم بەیەكەوە رەوانەبكات و دەیەوێت رێككەوتنەكانی پێشتر وەك خۆی جێبەجێبكرێن.
دوێنێ وەزارەتی دارایی هەرێم بڵاویكردەوە شاندی هەرێم بە مەبەستی بەدواداچوون بۆ مووچەی مانگەكانی 7 و 8ی فەرمانبەرانی هەرێم و شایستە داراییەكان بەپێی یاسای بودجە سەردانی بەغداد دەكاتەوە.
غەریب ئەحمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، هەندێك گرفتی تەكنیكی لەسەر بابەتی داهاتە نانەوتییەكان و قەرزەكان و پاكتاوە داراییەكان ماوە و تائێستا یەكلانەبووەتەوە كە چەند تێبینییەكی لەسەرە.
راشیگەیاند، تا ئێستا لایەنی بەغداد ئامادە نییە مووچەی مانگەكانی 7 و 8ی فەرمانبەرانی هەرێمی كوردستان بەیەكەوە بنێرێت دەیەوێت رێككەوتنەكانی پێشتر بەپێی یاسای بودجە جێبەجێبكرێن و ئەو مەرجانەی كە هەیەتی جێبەجێیبكات و ئێستاش لە عێراق رێوڕەسمی چلەی ئیمام حسێنە و بەشێكی زۆری فراكسیۆنی پەرلەمان لە بەغداد نین.
