میدیای فەرمی ئۆلێی فینلاندی لینکێک بە زمانی کوردی دەکاتەوە و تایبەتی دەکات بە ڕێنمایی و هەواڵەکانی کۆرۆنا.
لینکە کوردییەکە لەلایەن چەند کوردێکەوە بەڕێوەدەبرێت و دەخوێندرێتەوە و هەفتانە دووجار لەبارەی کۆرۆناوە دواین زانیاری دەدات بە کوردانی دانیشتووی وڵاتەکە.
ئامادەکاری پرۆگرامە کوردییەکە ناوی ڕێبوار کەریمی-یە و ئەو لەبارەی کارەکەیەوە دەڵێت، “میدیای ئۆلێ داوایان لێکردم کە هەواڵەکان بە زمانی کوردی وەربگێڕم و ئێستا هەفتانە دووجار بە زمانی کوردی – شێوەزاری سۆرانی، دەخوێندرێتەوە”.
ڕێبوار کەریمی بە پێگەی لاهدێنکوردیتی ڕاگەیاندووە، “لە بەشی کوردی ئۆلێ تەنها دوو کوردین، من و خانمێکی دیکەین کە من هەواڵەکان ئامادە دەکەم و ئەویش دەیخوێنێتەوە”.
بە وتەی ئامادەکاری پرۆگرامە کوردییەکە، هەفتانە دووجار ئەم بەرنامەیە پێشکەشدەکرێت و تایبەتە بە هەواڵەکانی ڤایرۆسی کۆرۆنا و ڕێنماییەکانی وڵات و چۆنیەتی خۆپارێزی”.
