عەبدولواحید محەمەد سەرۆکی یەکێتی مامۆستایانی کوردستان لە وتارێکدا دەڵێت، حکومەتی هەرێم هۆکاری کێشەی مووچەیە، بەتایبەت مووچەی مامۆستایان و ئامادە نییە بڕیاری دادگای فیدراڵی ژمارە 111 لە 21/2/2024 جێبەجی بکات و لە رێی هەژماری بانکییەوە مووچە بدات.
عەبدولواحید محەمەد، سەرۆکی یەکێتیی مامۆستایان لە وتارێکیدا کە لە ماڵپەڕی رەسمیی یەکێتی بڵاوکراوەتەوە، ئاماژەی بەوەکردووە، پێویستە حکومەتی فیدڕاڵی مانگانە مووچە لە رێگەی ژمارە حسابی بانکیەوە بدات، هاوکات پرۆژەیاسای بودجەی ساڵی 2024 ژمارە 12، دووپاتی ئەوەی کردووەتەوە کە دەبێت مووچەکان لە کاتی خۆیدا بدرێت.
دەشڵێت، “جگە لەوە حکومەتی هەرێمیشی پابەندکردووە دەقی ماددە و بڕگەکان وەکو خۆی جێبەجێ بکات، بەڵام حکومەتی هەرێم هێشتا ئامادە نییە ئەو بڕیارانە جێبەجێ بکات کە تەواو لە بەرژەوەندی مامۆستایان و مووچەخۆرانە.
ناوبراو ئاماژەی بەوەشکردووە، ئەم حکومەتی هەرێمە ئامادە نییە ژمارە حساب بەپێی بڕیاری دادگای باڵا لە بانکە حکومیەکان بکاتەوە، بە بیانوی ئەوەی خۆی ژمارە حساب لە بانکە ئەهلیەکان دەکاتەوە، لە لایەکیتر کە تا ئێستا ژمارە حساب نەکراوەتەوە دەبێت لیستی مووچە مانگانە بنێرنە لای وەزارەتی دارایی حکومەتی ناوەندی، لە مانگی دووەوە تا ئێستا یەک مانگ بە رێکوپێکی مووچە نەنێردراوە هەموو جارێ کێشەی تێدابووە و بووەتە هۆکاری دواکەوتنی مووچە.
