بەیانی ئەمڕۆ کاتژمێر 3:30 خولەک، لە چێشتخانەیەکی شاری هەولێر، بەهۆی نەمانی خواردنی سەروپێوە شەڕەتەقە ڕویداوە و سێ خواردنگە زیانی مادییان پێگەیشتووە.
پەیامنێری تۆڕی میدیایی ئێستا لە هەولێر ڕایگەیاند، کاتێک چەند کەسێک ڕۆشتوونەتە خواردنگەیەکی تایبەت بە سەروپێ، پاش ئەوەی خاوەنی خواردنگەکە وتوویەتی سەروپێ نەماوە، ئەو کەسانە کردویانە بەشەڕ و لە دوو شاگردی خواردنگەکەیان داوە و برینداریان کردوون.
پاش ئەم ڕوداوە، ئەو کەسانەی شەڕەکەیان دروستکردووە ڕۆشتوون چەکیان هێناوە و بە چەکی جۆری کڵاشینکۆف، دەستڕێژی گولەیان لە سێ خواردنگەی تەنیشت یەکدی کردووە.
وەک خاوەنی خواردنگەکان ئاشکرایدەکەن، کاتێک ئەو کەسانە هاتوونەتەوە و چەکیان هێناوە و تەقەیان کردووە خواردنگەکان کەسی لێنەبووە، بۆیە تەنها زیانی مادی بەر شوێنەکە کەوتووە.
