كۆمسیۆنی هەڵبژاردنەكانی عێراق رایدەگەیەنێت، ئامادەكارییەكانی دەستپێكردووە بۆ هەڵبژاردنی ئەنجومەنی پارێزگاكان.
جومانە غلای، وتەبێژی كۆمسیۆنی باڵای سەربەخۆی هەڵبژاردن لە عێراق رایگەیاند، هۆبەكانی هونەری و بەشە تایبەتمەندەكانی كۆمسیۆن دەستیانكردووە بە ئامادەكردنی رەشنووسی سیستمی تایبەت بە رێوشوێنەكانی نوێكردنەوەی تۆماری دەنگدەران، هەروەها نەخشەكێشانی گواستنەوەی ماددەكانی هەڵبژاردن و ئامادەكردنی هەردوو بەرنامەی تۆماری پارت و لایەنەكان و كاندیدانی بەشداربووی هەڵبژاردنەكان.
بەپێی یاساكەی بڕیارە هەڵبژاردنی ئەنجومەنی پارێزگاكان تا 20ی كانونی یەكەمی داهاتوو ئەنجامبدرێت، وەك ئەوەی غلای ئاماژەی پێدا و وتی، بۆیە كۆمسیۆن ئامادەكارییە پێشوەختەكانی دەستپێكردووە بۆ هەر قۆناغێك لە قۆناغەكانی پرۆسەی هەڵبژاردن.
وتەبێژی كۆمسیۆن ئەوەشی خستەڕوو، پرۆسەی هەڵبژاردن بە چەند قۆناغێكدا تێدەپەڕێت، سەرەتا بە نوێكردنی تۆماری دەنگەدان و دواتر تۆماركردنی پارت و كاندیدەكان، پاشان ئامادەكارییە هونەری و لۆجستییەكانی بەر لە قۆناغی دەنگدان و دواهەمینیش قۆناغی پاش دەنگدان و جیاكردنەوەی دەنگەكان دەبێت.
بڕیارە لەمساڵدا هەڵبژاردنی ئەنجومەنی پارێزگاكان لە كەركوك و پارێزگاكانی دیكەی عێراق جگە لە هەرێم بەڕێوەبچێت.
