سەرۆكی یەكێتی رایدەگەیەنێت، دۆخی حکومڕانی لە هەرێمی کوردستان پێویستی بە پێداچوونەوە و راستکردنەوەیە و حکومەت نەیتوانیوە وەڵامدەرەوەی خواستەکانی خەڵک بێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە یان برێم، کونسوڵی گشتیی فەرەنسا لە هەرێمی کوردستان کرد.
لە دیدارەکەدا پرسی هەڵبژاردن لە هەرێمی کوردستان گفتوگۆی لەبارەوە کرا و سەرۆک بافڵ جەلال تاڵەبانی ئاماژەی بەوەکرد، دۆخی حكومڕانی لە هەرێمی کوردستان پێویستی بە پێداچوونەوە و راستکردنەوەیە، حکومەت نەیتوانیوە وەڵامدەرەوەی خواستەکانی خەڵک بێت و ئەو ئامانجانە بپێکێت کە چاوەڕێ دەکرا.
وتیشی، “بۆیە هەڵبژاردنی ئەمجارە گۆڕانکاریی گەورە لەگەڵ خۆیدا دەهێنێت و هەرێمەکەمان بەرەو قۆناغێکی گرنگ هەنگاودەنێت کە ئەویش هێنانەکایەی حکومڕانییەکە بۆ هەمووان نەک بۆ هێز و لایەنێکی دیاریکراو”.
لە دیدارەكەدا دۆخی گشتیی هەرێمی کوردستان و هەماهەنگیی نێوان هێز و لایەنە سیاسییەکان بە ئامانجی پاراستنی سەقامگیریی ناوچەکە گفتوگۆیان لەبارەوەکرا، وەك ئەوەی لە راگەیەندراوی كۆبوونەوەكەدا هاتووە.
