سەرۆکی دەزگای لوتکە بۆ کاروباری ئاوارە و پەنابەران بڵاویکردەوە، لە ئاکامی رووداوێک لە نێوان بەلەمێکی کۆچبەران و کەشتییەکەی پۆلیسی پاسەوانی یۆناندا کۆچبەرێک گیانیلەدەستدا.
ئاری جەلال، سەرۆکی دەزگای لوتکە بۆ کاروباری ئاوارە و پەنابەران ئاماژەی بەوەکردووە، بەلەمەکە بەلەمێکی خێرا بووە کە کۆچبەرانی لە تورکیاوە هەڵگرتووە و هەوڵی پێکدادانی لەگەڵ کەشتییەکی پاسەوانی کەناراوەکانی یۆناندا داوە.
ئاماژە بەوەشکراوە، رووداوەکە لە شاری سیمی روویداوە و بەلەمەکە 13 کۆچبەری هەڵگرتبوو، رووداوەکە بەهۆی ئەوەوە روویدا کە بەلەمە خێراکە کۆچبەری هەڵگرتبوو لە کەناراوەکانی تورکیاوە پابەندنەبوون بە سیگناڵە بینراو و دەنگییەکان کە لەلایەن پاسەوانی کەناراوەکانەوە دەردەچن.
باس لەوەشکراوە، کاپتنی بەلەمەکە سەلامەتی جەستەیی کۆچبەران و تیمی کەشتییەکەی پاسەوانی کەناراوەکانی خستە مەترسییەکی گەورەوە و دواتر بریندارێکی لێکەوتەوە و بریندارەکە دوای گواستنەوەی بۆ نەخۆشخانەی گشتی رۆدس گیانیلەدەستدا.
جێگەی ئاماژەیە تاوەکو ئێستا ناسنامەی کۆچبەرەکان ئاشکرانەکراوە.
