قوباد تاڵەبانی، جێگری سەرۆک وەزیران پێشوازی لە یاکۆ بیرێندس، کونسوڵی گشتیی هۆڵەندا لە هەرێمی کوردستان کرد و گفتوگۆی چەند پرسێکیان کرد.
بە گوێرەی راگەیەندراوی نوسینگەی قوباد تاڵەبانی، لە کۆبوونەوەکەدا، جێگری سەرۆک وەزیران بە ئاماژەدان بە هاوکارییەکانی هۆڵەندا لە ماوەکانی رابردوودا بۆ چاکسازیی لە وەزارەتی پێشمەرگە و ریفۆرمی ئابوری و چەند بوارێکی دیکە، هیوای خواست ئەم هاوکارییانە لە داهاتووشدا بەردەوامیان هەبێت و پەیوەندییەکانی نێوان هەردوولا بەرەوپێشچوونی زیاتریش بەخۆیەوە ببینێت.
ئاماژە بەوەشکراوە، پێویستیی پەرەپێدان بە تواناکانی گەنجانی کارساز و داهێنەر، وەک تەورێکی گرنگ گفتوگۆکراوە و هەردوولا هاوڕابوون لەسەر پەرەپێدانی تواناکانی گەنجانی کارساز و داهێنەر کە یارمەتیدەر دەبێت لە گەشەسەندنی ئابوری و کەرتی تایبەت لە هەرێمی کوردستان.
هەر لە کۆبوونەوەکەدا قوباد تاڵەبانی هیوای خواستووە، هۆڵەندا لە بواری پەرەپێدانی تواناکانی گەنجاندا هاوکاریی هەرێمی کوردستان بکات.
