بەڕێوەبەرایەتیی ئۆپەراسیۆنەکانی دەزگای ئاسایشی هەرێم دەستگیركردنی هەشت داواكراوی داعش رادەگەیەنێت.
بەڕێوەبەرایەتییەكە لە راگەیەندراوی ژمارە (1)ی خۆیدا دەڵێت، لەسەر بنەمای هەماهەنگی و هەواڵگریی، بە هاوکاری دەزگا ئەمنییەکانی عێراق زانیاریی دروست بەدەستهات لەسەر ژمارەیەک تیرۆریستی داعشی لە یاسا هەڵهاتوو کە بە ماددەی 4ی تیرۆر داواکراوبوون.
داواكراوان بە مەرامی خۆحەشاردان روویان لە هەرێمی کوردستان کردووە و لە سنووری پارێزگای سلێمانی نیشتەجێبوون.
ئۆپەراسیۆنەکانی دەزگای ئاسایشی دەشڵێت، دوای رەزامەندی دادوەری ئاسایش، لێکۆڵینەوەی مەیدانی لەسەر ئەو کەیسە دەستیپێکرد و دوای چەندین رۆژ بەدواداچوون سەرئەنجام شوێنی مانەوەی داواکراوان دەستنیشانکران و خرانە ژێر چاودێریی هێزەکانیانەوە.
پاش دڵنیابوونەوە لە چەند ئۆپەراسیۆنێکدا بە هاوکاریی بەڕێوەبەرایەتیی ئاسایشی سلێمانی و بەڕێوەبەرایەتیی ئاسایشی رۆژئاوای سلێمانی لە شەوانی (15، 16، 17، 23 و 26)ی ئازاری 2023 هەر هەشت تۆمەتبار دەستگیركران، كە بەرەگەز عەرەب-ن بە ناوەكانی (ع.خ.)، (ع.ن.)، (م.م.)، (ع.ف.)، (ئ.ف.)، (ئ. ن.)، (ق. ئ.) و (ع. ئ.).
لە كۆتایشدا روونیدەكاتەوە، لەبەر سەلامەتیی رێڕەوی لێکۆڵینەوەکان، بەشێک لە زانیارییەکان بە نهێنی هێڵرانەوە و سەرجەم دەستگیرکراوان رووبەڕووی دەسەڵاتی دادوەری کرانەوە.
