وەزیری دارایی هەرێمی كوردستان رایدەگەیەنێت، گەشبینن بە چارەسەركردنی كێشەی مووچە لەگەڵ حكومەتی عێراق و زیاتر دەستكراوە دەبن بۆ جێبەجێكردنی پڕۆژە خزمەتگوزارییەكان و بەرەو پێشبردنی زیاتری كەرتی پەروەردە و خوێندنی باڵا.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە تێیدا هاتووە، رۆژی سێشەممە ئاوات شێخ جەناب وەزیری دارایی و ئابوری، پێشوازیكرد لە تاریق حەیدەری قایمقامی كۆیە و سەرۆكی شارەوانی و بەڕێوەبەری ڕیگاوبانی قەزاكە.
لە راگەیەندراوەكەدا هاتووە، هەر ئەمڕۆ وەزیری دارایی پێشوازیكرد لە وەفدێكی زانكۆی پۆلیتەكنیكی گەرمیان و پەیمانگای تەكنیكی بەكرەجۆ و لە كۆبوونەوەیەكدا هەنگاوەكانی بەرەوپێشبردنی كەرتی خوێندنی باڵا و بوونیادنانی ژێرخانی زانكۆ و پەیمانگاكان گفتوگۆیان لەبارەوە كرا.
هەر لە راگەیەندراوەكەدا هاتووە، وەزیری دارایی گەشبینی خۆی نیشاندا بەچارەسەركردنی كێشەی مووچە لەگەڵ حكومەتی فیدراڵ كە زیاتر دەستكراوەتر دەبن بۆ جێبەجێكردنی پڕۆژە خزمەتگوزارییەكان و بەرەو پێشبردنی زیاتری كەرتی پەروەردە و خوێندنی باڵا.
