بەئامادەبوونی بافڵ جەلال تاڵەبانی، سەرۆکی یەکێتیی نیشتمانیی کوردستان، شاندی باڵای یەکێتی و پارتی لە پیرمام كۆدەبنەوە.
دوێنێ سالار لالە سەرحەد، لێپرسراوی بۆردی پەیوەندییە كوردستانییەكانی یەكێتی و ئەندامی شاندی یەكێتی بۆ كۆبوونەوە لەگەڵ پارتی رایگەیاند، كۆبوونەوە باڵاكەی یەكێتی و پارتی لە پیرمام درێژەپێدەری كۆبوونەوەكانی رابردووی نێوان هەردوولایە و بۆ ئاساییكردنەوەی پەیوەندییەكان.
ئاماژەی بۆ ئەوەش كرد، پرسی هەڵبژاردنەكان، بارودۆخی ناوخۆی هەرێمی كوردستان و پەیوەندیيەكانی هەرێم و بەغداد تەوەری كۆبوونەوەكە دەبێت.
دوایین كۆبوونەوەی هەردوولا لە 26ی حوزەیرانی رابردوو لە بارەگای مەکتەبی سیاسیی یەکێتی لە هەولێر بەڕێوەچوو و تیایدا دۆخی سیاسیی هەرێمی كوردستان، پەیوەندییەكانی هەردوولا و رووداو و ئەگەرەكانی بەردەم هەرێم تاوتوێكران.
