توێژینەوەیەكی نوێ هۆشداریدەدات دەربارەی خواردنەوە وزەبەخشەكان و پەیوەندییان بە نەخۆشییە مەترسیدارەكان، چونكە مەترسی گرفتی دڵ و ناڕێكی لێدانی دڵی لێدەكەوێتەوە.
گۆڤاری (Heart Rhythm)ی تایبەت بە تەندروستیی دڵ توێژینەوەیەكی بڵاوكردەوە كە زانیارییەكانی 144 نەخۆش لەخۆدەگرێت كە لە جەڵتەی دڵ رزگاریان بووە پاش وەرگرتنی چارەسەری بەپەلە، دەركەوتووە حەوتیان، كە تەمەنیان لەنێوان 20 بۆ 42 ساڵدایە، خواردنەوەی وزەبەخشیان خواردووە بەر لە تووشبوون بە جەڵتەی دڵ، لەوانە شەشیان پێویستیان بە چارەسەری لێدانی كارەبایی بووە، حەوتەمیشیان بوژاندنەوەی دەستی.
دكتۆر مایكڵ ئەكریمان، پزیشكی بواری بۆماوەیی دڵ و نووسەری توێژینەوەكە دەڵێت، پێدەچێت پەیوەندییەكی پەیوەست بە كات لەنێوان خواردنەوە وزەبەخشەكان و جەڵتەی لەناكاوی دڵدا هەبێت.
ئاماژەی بەوەشدا كە هۆكاری دیكە هەن بەرپرسن لە بارە تەندروستییەكە وەك بێبەشبوون لە خەو، وشكبوونەوە و بەڕۆژووبوونی قورس و، وتی، “ئەگەری هەیە بەكارهێنانی نائاسایی خواردنەوە وزەبەخشەكان لەگەڵ گۆڕانكارییەكانی دیكە، ژینگەیەكی لەباریان بۆ جەڵتەی لەناكاوی دڵ لەو كەسانەدا دروستكردبێت”.
بەپێی توێژینەوەكە، خواردنەوە وزەبەخشەكان كافایینیان لەنێوان 80 میلیگرام تا 300 میلیگرام بۆ هەر بەشێك تیایە، بەراورد بە 100 میلیگرام لەناو كوپێك قاوەدا. جگە لەوەی چەند پێكهاتەیەكی دیكەی وەك تورین و جوارانا-ی تیایە، كە باوەڕوایە ئەم پێكهاتانە كاریگەرییان لەسەر رێژەی لێدانی دڵ، فشاری خوێن و ئەركەكانی دیكەی دڵ هەیە.
خواردنەوە وزەبەخشەكان لە دوو هاندەری سەرەكی پێكدێن، كافایین و شەكر، كە كاریگەریی گەورەیان لەسەر جەستەمان هەیە، كافایین لێدانی دڵ زیاددەكات، ئەمە نهێنی ئەوەیە كە خواردنەوەكە خەڵك بەئاگایی بۆ ماوەیەكی زیاتر دەهێڵێتەوە و تەركیزیان زیاددەكات.
شەكر-یش رێژەی گلۆكۆز لە خوێندا زیاددەكات، بڕێك وزە لە ماوەیەكی كورتدا دەبەخشێت و دواتر جارێكی دیكە دادەبەزێتەوە، ئەمەش كاریگەری لەسەر باری دەرونیت دروستدەكات و، واتلێدەكات پاش خواردنەوەی زیاتر هەست بە برسێتی بكەیت.
