بارانی بەخور لە بەرەبەیانی ئەمڕۆوە هەولێری گرتووەتەوە و بەهۆیەوە لە چەند شوێنێک لافاو دروستبووە و زیانی لێکەوتووەتەوە.
پەیامنێری تۆڕی میدیایی ئێستا زانیاریی زیاتری لایە:
شەوی رابردوو بەڕێوەبەرایەتیی گشتیی کەشناسی هەرێم رایگەیاند، پێشبینى دەکرێت لە دوای نیوەشەو شەپۆلێکى بارانبارین و هەورە تریشقە لە سەرجەم ناوچەکانى هەرێم دەستپێبکات.
ئەوەشی خستەڕوو، “لە ناوچەکانى (سەنتەرى هەولێر و دەوروبەرى، بەحرکە، قوشتەپە، دارەتوو، کەوەر گۆسک، بەردەرەش، ناوچەکانى دەشتى هەولێر، قەزای کۆیە، تەقتەق، شوان، ئاکرێ، هەندێک ناوچەى گەرمیان و باشوورى شارى سلێمانى) بارانی بەلێزمە دەبێت تابەرەبەیان”.
باسی لەوەشکرد، بۆ ناوچەکانى تر باران و هەورە تریشقەى مامناوەند دەبێت و پاشان ئاستى شەپۆلەکە ئاسایی دەبێتەوە، پاشان ئاستى شەپۆلەکە دیسان بەهێزدەبێتەوە و بەتایبەت لە کاتەکانى نیوەڕۆدا بۆ سەر ناوچەکانى رۆژهەڵاتى هەولێر، ئیدارەى سۆران، راپەڕین، سەنتەرى شارى سلێمانى، سەیدسادق، هەڵەبجە و هەندێک لە ناوچەکانى گەرمیان.
