کۆمپانیای دانە غاز لە راگەیەندراوێکدا بڵاویکردەوە، دوای گەیشتنی رێنمایی لە ئەبوزەبییەوە و بە پشت بەست بە بەهێزکردنی بەرگرییەکان و پابەندنبوون بە پاراستنی کارمەندەکان، بەرهەمهێنان لە کۆرمۆر دەستپێدەکەنەوە و هەنگاوەکان لە ئەمڕۆ 1ی ئایارەوە دەستپێدەکات.
دانە غاز لە راگەیەندراوەکەی ئەمڕۆ 1ی ئایاریدا ئاماژەی بەوەکردووە، بە پشتبەستن بە هەنگاوی کۆنکرێتی لەلایەن حکومەتی عێراق و حکومەتی هەرێمی کوردستانەوە ئەنجامدراون بۆ بەهێزکردنی بەرگرییەکان لە کۆرمۆر و پابەندبوونە پتەوەکان لە ئاستە بەرزەکانی هەردوو دەسەڵات، دانەغاز و هاوبەشەکانی هەنگاویان ناوە بۆ دەستپێکردنەوەی بەرهەمهێنان لە کێڵگەی کۆرمۆر.
لە راگەیەندراوەکەدا جەختیشکراوەتەوە، دەستپێکردنەوەی بەرهەمهێنان لە کێڵگەکە بە شێوەیەکی قۆناغ بە قۆناغ ئەنجام دەدرێت و رێوشوێنی نوێ جێبەجێ دەکرێت بۆ زۆرترین سەلامەتی هەموو کارمەندان و دامەزراوەکان.
کۆمپانیاى دانە غاز لەماوەی رابردوو کارەکانی لە کێڵگەی کۆرمۆر راگرت ئەوەش بەهۆی ئەو هێرشە درۆنیەوە بوو کە 26ى نیسان کرایە سەری و بەهۆیەوە چوار کارمەندى کۆمپانیاکە گیانیان لەدەستدا و ژمارەیەکی دیکەش برینداربوون.
