سەرچاوە ئیسپانیەکان بڕیاری کۆتایی زینەدین زێدانی ڕاهێنەری یانەی ڕیاڵ مەدریدیان لەبارەی بەردەوامبوون، یاخود ڕۆیشتنی ئیسکۆ و لوکا یوڤیچ ئاشکراکردووە.
تۆڕی “ئەی بی سی” ئیسپانی ئاشکرایکردووە، ئیسکۆ لە بارودۆخی وەرزشی خۆی ڕازی نییە و بۆ بەدەستهێنانی چانسی یاریکردن بڕیاریداوە پەیوەندی بە یانەیەکی دیکەوە بکات، ئەوەش لە پێناو یاریکردن لە جامی نەتەوەکانی ئەوروپا (یورۆ 2020 -2021).
بەپێی سەرچاوەکە، زینەدین زێدان کۆبوونەوەی لەگەڵ یاریزانان ئەنجامداوە و بە ئیسکۆی ڕاگەیاندووە، کە پێویستی بە تواناکانیەتی و دەستبەرداری نابێت، دووپاتیشیکردووەتەوە، لە قۆناغی دووەمی وەرزی 2020/2021 چانسی یاریکردنی تەواوی پێدەدات.
ڕاهێنەرە فەرەنسیەکە بە تەنها لەبارەی ئیسکۆوە بڕیارینەداوە و کۆبوونەوەی لەگەڵ ماریانۆ دیاز و لوکا یوڤیچ، دوو هێرشبەری یەدەگی پێکهاتەکانی کردووە و بەردەوامبوونی ماریانۆی یەکلاییکردووەتەوە، لە بەرانبەردا دەرگای بۆ یوڤیچ کردووەتەوە پەیوەندی بە یانەیەکی دیکە بکات.
یانەکانی میلان و ئینتراخت فرانکفۆرت و وڵڤەرهامپتن ڕەزامەندییان نیشانداوە بەشێوەی خواستن، یاخود گواستنەوەی هەمیشەیی بۆند لەگەڵ هێرشبەرە سڕبیەکە واژووبکەن.
