وەزارەتی تەندروستیی هەرێم رایدەگەیەنێت، سورێژە نەخۆشییەكی ڤایرۆسی توندی مەترسیداری درمییە دووچاری كۆئەندامی هەناسەدان دەبێت و دواتر بە لەشدا بڵاودەبێتەوە و ئەو كەسانەی دووچاری سوورێژەدەبن لەهەر تەمەنێكدا بێت، ئەگەر كەسەكە پێشتر سورێژەی نەگرتبێت یاخود كوتانی بۆ نەكرابێت زیاتر منداڵان و ژنانی دووگیان مەترسیان لەسەرە ئەگەر ڤاكسینیان وەرنەگرتبێت تووشی ئەم نەخۆشیە ببن.
ڕێكارەكانی گواستنەوەی سورێژە:
ئەم ڤایرۆسە بە ئاسانی لە رێگای كەسێكەوە بۆ كەسێكی تر دەگوازرێتەوە لەهەوادا لە رێگای”
* هەناسەدان و كۆكە و پژمە.
* دەستلێدانی ئەو رووانەی ڤایرۆسەكەیان پێوەیە.
* لەكەسێكی تووشبوو دەگوازرێتەوە بۆ كەسێكی ساغ لەماوەی چوار رۆژ پێش دەركەوتنی پەڵەی پێست و چوار رۆژ دوای دەركەوتنی پەڵەی پێست لە كاتی تووشبوون بە ڤایرۆسەكە.
نیشانەكانی سورێژە:
نیشانە سەرەتاییەكانی بە گشتی دوای 10 بۆ 14 رۆژ دەردەكەوێت و دوای چوونە ژوورەوەی ڤایرۆسەكە بۆ ناو لەش و دەركەوتنی پەڵەی پێست دوای 7بۆ 18 ڕۆژ و ئەمانە نیشانەكاتنی نەخۆشیەكەیە:
– بوونی تایەكی بەهێز و كۆكە و هەڵامەت.
– پەڵەی سەر پێست.
– سووربوونەوە و تەڕیی چاوەكان.
دوای 3 بۆ 5 رۆژ لە دەركەوتنی نیشانە سەرەتاییەكانی پەڵە لەسەر پێست دروستدەبێت بە شێوەی پەڵەی سوور بەبێ كێم و برین، پەڵەكان لەدەم و چاو و بەشی سەرەوەی مل دەستپێدەكات تاپشتی گوێیەكان، لەوانەیە لە منداڵی شیرەخۆر و منداڵی تر سكچوون دروستبكات.
دەرەنجامە لاوەكیەكانی دوای تووشبوون بە سورێژە
* سكچوونی توند و ڕشانەوە.
* هەوكردنی گوێ و هەوكردنی سییەكان.
* هەوكردنی مێشك (هەڵاوسانی مێشك) پێدەچێت ببێتە هۆی كەڕبوون یان كێشەی بیروهۆش.
* كەڕبوون یان كوێربوون.
* لەبارچوونی منداڵ لای دایكی دووگیان یان مردنی كۆرپە لەسكی دایكی یان پێشوەختە لەدایكبوون.
* دابەزینی كێشی منداڵی تازە لەدایكبوو.
رێكارەكانی خۆپاراستن لەسوورێژە:
وەرگرتنی ڤاكسین باشترین رێكاری خۆپارێزییە لە نەخۆشیی سوورێژە ، وەرگرتنی ڤاكسین بەرگریی درێژخایەن دەدات بەرامبەر نەخۆشی سورێژە كە دەگاتە 97%.
چی بكرێت لەكاتی تووشبوون بە سورێژە؟
– مانەوە لەماڵەوە و دووركەوتنەوە لە شوێنە گشتییەكان و بەكارنەهێنانی هۆكاری گواستنەوەی گشتی.
– سەردان نەكردنی كەسانی تر بە تایبەت ئەوانەی كوتانی سورێژەیان بۆ نەكراوە.
– وەرگرتنی مۆڵەتی خوێندن و لەدەوام تاوەكو بەچاكبوونەوەی تەواوەتی.
