نزیکەی 15%ی کارەکانی پرۆژەی بەرزەپردی حەپسەخانی نەقیب لە سلێمانی تەواوبوون.
سەڵاح نوری، ئەندازیاری سەرپەرشتیار لە سەرۆکایەتیی شارەوانیی سلێمانی رایگەیاند، نزیکەی 15%ی کارەکانی پرۆژەی بەرزەپردی حەپسەخانی نەقیب تەواوبوون و کارکردن تیایدا بەردەوامە.
ئاماژەی بەوەشکرد، لە رۆژی 11ی کانوونی یەکەمی 2024ەوە دەستمان بە پرۆژەکە کردووە و تێچووەکەی پێنج ملیار و 800 ملیۆن دینارە.
پرۆژەی بەرزەپردی حەپسەخانی نەقیب دەکەوێتە سەر شەقامی بازنەیی مەلیک مەحمود لە نزیك ناوچەی پیشەسازیی سلێمانی، و بڕیارە لە ماوەی ساڵێکدا کارەکانی تەواوبکرێن.
لەبارەی پرۆژەکەوە سەرۆکایەتیی شارەوانیی سلێمانی دەڵێت، یەکێکە لە پرۆژە گرنگ و ستراتیژییەکان کە بەتەواوبونی خزمەتێكی گەورە بە شاری سلێمانی دەگەیەنێت و دەبێتە هۆی كەمكردنەوەی لۆد و قەرەباڵغی سەر شەقامی بازنەیی مەلیک مەحمود.
