بڕیارە ئێوارەی ئەمڕۆ لیژنەی بینینی مانگ کۆببنەوە و بڕیار لەبارەی دیاریکردنی یەکەمین رۆژی مانگی رەمەزان بدەن، هەر ئەمڕۆش قائیمقامیەتی سلێمانی ئامادەکارییەکانی بۆ ئەم مانگە خستەڕوو.
ئاوات محەمەد قائیمقامی سلێمانی لە کۆنگرەیەکی رۆژنامەوانیدا رایگەیاند، لە سبەینێوە تیمێکی جیاوازتر دروستدەکەین تایبەت بە مانگی رەمەزان بۆ جێبەجێکردنی کۆی ئەو رێنماییانەی پەیوەندیدارن بەو مانگەوە لە چاودێریکردنی نرخی بازاڕ و پابەندبوون بە رێنماییە تەندروستییەکان و لایەنی ئاسایش و ئەمنی شارەکە.
داوایشیکرد، بازرگان و فرۆشیارەکان خواستی هاوڵاتییان لەسەر کاڵاکان و هاتنی مانگی رەمەزان نەکەن بە دەرفەت بۆ گرانکردنی نرخەکان، یان خواردنی ماوە بەسەرچوو بخەنە بازاڕەوە.
ئاشکراشیکرد، هێزە ئەمنییەکان لە مانگی رەمەزاندا لە بازاڕ و شوێنە گشتییەکاندا ئامادەیی تەواویان دەبێت، جگە لەوەش سەرجەم فەرمانگەکان هەر ئەرکێکیان لەسەرشان بێت تایبەت بە مانگی رەمەزان بە تەواوی ئامادەکارییان کردووە و جێبەجێی دەکەن.
