دەستەی دەستپاکیی عێراق راپۆرتی ساڵی 2023ی بڵاوکردەوە و ئاماژەی بەوەکردووە، زیاتر لە 18 هەزار تۆمەت لەسەر 14 هەزار کەس هەیە کە 55 وەزیر و پلە وەزیری تێدایە و 350 پلەداری تایبەت و بەرێوەبەری گشتی تێدایە.
بە گوێرەی راپۆرتەکەی دەستەی دەستپاکیی عێراق، لە ماوەی ساڵی رابردوودا دەستەکە چاوی بە (60,213) راپۆرت و دۆسیەی تاواندا خشاندووەتەوە، کاری کردووە لەسەر (27,170) دۆسیەی تاوانکاری، کە (16,063) دۆسیەی لەرێگەی رێکارە دادوەرییەکانەوە تەواوکراون و (8277) ) دۆسیەی ساڵی 2022 بووە.
لە راپۆرتەکەدا ئاماژە بەوەشکراوە، ژمارەی تۆمەتباران تێیدا گەیشتووەتە (14 هەزار و 84) تۆمەتبار، (18 هەزار و 868) تۆمەتیان دراوەتە پاڵ لەسەری.
ئاماژەی بەوەشکردووە، لەنێویاندا (55) وەزیر و پلە وەزیر هەن، کە (81) تۆمەتیان لەسەرە، (350) تۆمەتبار لە پلە تایبەتەکان و بەڕێوەبەرە گشتیەکان و ئەوانەی لەو پلەیەدان تۆمەتبارن بە (598) تۆمەت.
