ئەندامێکی ئەنجومەنی نوێنەرانی عێراق رایگەیاند، تا ئێستا هیچ بەرەوپێشچوونێک لە پرسی هەڵبژاردنی سەرۆکی ئەنجومەنی نوێنەران رووینەداوە و کۆبوونەوەکان ئەنجامی ئیجابیان نەبووە.
غەریب عەسکەر ئەندامی ئەنجومەنی نوێنەرانی عێراق رایگەیاند، لەگەڵ ئەو گفتوگۆ و دانوستانانەی لە چەند رۆژی رابردوودا لەبارەی هەڵبژاردنی سەرۆکی ئەنجومەنی نوێنەرانی عێراق ئەنجامدراون، هیچ بەرەوپێشچوونێک لەو بارەیەوە روویاننەداوە و تا ئێستا ئەو پرسە بێچارەسەر ماوەتەوە.
ئاماژەی بەوەشکرد، چارەسەری ئەم قەیرانە پەیوەستە بە رێکەوتنی نێوان لایەنە سیاسییە سونییەکانەوە، ئێمە وەک لایەنەکانی چێوەی هەماهەنگی کار بۆ نزیککردنەوەی بیروبۆچوونەکان دەکەین لەنێوان لایەنە سیاسییەکاندا، لەگەڵ ئەوەشدا ناکۆکییەکان بەردەوامن و هیچ لایەنێک ئامادەی سازش نییە بۆ لایەنەکەی دیکە.
