شێخ مەشعەل ئەحمەد جابر سەباح، ئەمیری کوەیت فەرمانی هەڵوەشاندنەوەی ئەنجومەنی نیشتمانیی وڵاتەکەی دەرکرد و رایگەیاندووە بەهۆی سەرپێچیکردن و دەستێوەردان لە دەستوورەوە هەڵدەوەشێندرێتەوە.
لە بەیاننامەیەکدا کە حکومەت بەناوی شێخ مەشعەل ئەحمەد جابر سەباح، ئەمیری کوەیت بڵاویکردووەتەوە، ئاماژەی بەوە کردووە، “دوای پێداچوونەوە بە دەستوور و ماددەی 107ی ئەنجومەنەکە و لەسەر بنەمای پێشێلکردنی بنەما دەستوورییەکان لەلایەن ئەنجومەنی نیشتمانییەوە، هەروەها بە رێزگرتن لە فەرمانگەی باڵا و بە پشتبەستن بە پێشنیاری سەرۆکی حکومەت و دوای رەزامەندی ئەنجومەنی وەزیران ئەو بڕیارە دراوە”.
ئاماژە بەوەشکراوە، “سەرۆکی حکومەت و وەزیرەکان هەریەکەیان لە چوارچێوەی دەسەڵاتی خۆیاندا دەبێت ئەم فەرمانە جێبەجێبکەن و لە بەرواری دەرچوونیەوە دەچێتە بواری جێبەجێکردنەوە و لە رۆژنامەی فەرمیدا بڵاودەکرێتەوە”.
قەیرانی سیاسی لە نێوان حکومەت و پەرلەماندا سەریهەڵدا و بووە هۆی ئەوەی حکومەت ئامادەنەبێت لە دانیشتنی ئەنجومەنی نیشتمانی لە چوارشەممەی رابردوودا و ئەوەش بووە هۆی هەڵگرتنی دانیشتنەکە.
