کەشناسی هەرێم باس لەوەدەکات، پلەی گەرمی لە ئەمڕۆ و سبەینێدا بەرزدەبێتەوە و ئاسمان ساماڵ و پەڵە هەور دەبێت، دەستەی کەشناسی عێراقیش دەڵێت، “چوارشەممە شەپۆلێکی بارانبارین سەرانسەری عێراق بە هەرێمی کوردستانیشەوە دەگرێتەوە.”
ئەمڕۆ یەکشەممە، بەڕێوەبەرایەتی گشتیی کەشناسی هەرێم پێشبینیی کەشوهەوای بڵاوکردەوە و دەڵێت، ئەمڕۆ ئاسمان ساماڵ و پەڵە هەور دەبێت و پلەی گەرمی کەمێک بەرزدەبێتەوە بە بەراوورد بە پلەکانى دۆێنێ و سبەی ئاسمان ساماڵ و پەڵە هەور دەبێت، لە ئێوارەدا دەگۆڕێت بۆ نیمچە هەور.
هاوکات دەستەی کەشناسی عێراقیش باسی لە کەشوهەوای چوار رۆژی داهاتوو کردووە و ئاماژەی بەوەکردووە، شەپۆلێکی بارانبارین ناوچەکانی عێراق بە هەرێمی کوردستانیشەوە دەگرێتەوە و لە رۆژی چوارشەممە شەپۆلەکە دەستپێدەکات و ئاسمان هەور دەبێت، رۆژی پێنجشەممە کاریگەری شەپۆلەکە زیاتر دەبێت و بارانی زیاتر دەبارێت و پلەی گەرمی دابەزین بەخۆیەوە دەبینێت.
بە گوێرەی پێگە جیهانییەکانی کەشوهەوا، ئەو شەپۆلەی رۆژی چوارشەممە کاریگەرییەکەی دەستپێدەکات تا رۆژی شەممە 16ی شوبات بەردەوامیی دەبێت.
