وەزیری دارایی هەرێم رایدەگەیەنێت، بە تەواوبوونی پرۆژەی هەژماری من فەرمانبەران لە چەندین خزمەتگوزاریی دارایی و بانکی سودمەنددەبن.
وەزارەتی دارایی هەرێم لە راگەیەندراوێکدا بڵاویکردەوە، ئاوات جەناب نوری، وەزیری دارایی و ئابوری سەردانی دیوانی پارێزگای سلێمانی کرد و تیمەکانی پرۆژەی (هەژماری من)ی لە نوسینگەی سەرۆک وەزیرانی هەرێمی کوردستان بەسەرکردەوە.
باس لەوەش دەکات، لە دیدارێکدا لەگەڵ هەڤاڵ ئەبوبەکر پارێزگاری سلێمانی باس لە گرنگی و بایەخی پرۆژەی (هەژماری من) کرا، وەزیری دارایی پشتیوانی پارێزگاری سلێمانی بۆ سەرخستنی پرۆژەکە بەرز نرخاند و رایگەیاند (هاژماری من) پرۆژەیەکی گرنگ و پێویستی ئەم قۆناغەیەو بەتەواوبوونی ئەو پرۆژەیە کێشەی کاش و نەبونی سیولە بەتەواوی چارەسەر دەبێت.
دەشڵێت، بە تەواوبوونی پرۆژەکە لەلایەن بانکە تایبەتەکانەوە چەندین خزمەتگوزاری وەک پێدانی قەرزو سلفە پێشکەش بەفەرمانبەران دەکرێت، جگە لەوە فەرمانبەر دەتوانێت پرۆسەی حەواڵەو کڕینی کاڵا بە شێوەی ئەلیکترۆنی و راکێشانی پارە لەوڵاتان و چەندین کارئاسانی تر لەرێی کارتی هەژماری منەوە ئەنجامبدات.
