کۆشکی باکینگهام بڵاویکردەوە، چارلزی سێیەم پادشای بەریتانیا هەفتەی داهاتوو بە مەبەستی وەرگرتنی چارەسەی هەڵاوسانی پرۆستات رەوانەی نەخۆشخانە دەکرێت.
لە راگەیەندراوێکی کۆشکی باکینگهام_دا هاتووە، هەفتەی داهاتوو بە مەبەستی وەرگرتنی چارەسەری هەڵاوسانی پرۆستات چارلزی سێیەم رەوانەی نەخۆشخانە دەکرێت و بۆ ماوەیەک لە ئەرکە فەرمییەکانی دووردەکەوێتەوە.
میدیاکانی بەریتانیا بڵاویانکردەوە، پادشا سوورە لەسەر ئەوەی وردەکاری چارەسەرییەکانی بڵاوبکاتەوە بە ئامانجی هاندانی پیاوانی دیکە کە هەمان نیشانەی نەخۆشییەکەی ئەویان هەیە سەردانی نەخۆشخانە بکەن و پشکنینی پێویست بکەن.
ئەمە لە کاتێکدا کۆشکی کنسینگتۆن بڵاویکردەوە، شازادە کەیت شازادەی وێڵز و هاوسەری ولیام شازادەی جێنشین نەشتەرگەرییەکی لە سکیدا بۆ ئەنجامدراوە و لە نەخۆشخانەیە.
