لە بازاڕە جیهانییەکاندا، نەوتی خاو نزیکەی 1٪ی بەهاکەی لەدەستدا، ئەوەش دوای ئەوەی نرخی نەوتی خاوی سعودی دابەزینی بەخۆیەوە بینی و ئاستی بەرهەمهێنانی رێکخراوی ئۆپیک زیادی کرد.
ئەمڕۆ دووشەممە، بەرمیلێک نەوتی خاوی برێنت بە 77 دۆلار و 80 سەنت مامەڵەی پێوە دەکرێت، و بەرمیلێک نەوتی خاوی ئەمریکیش بە 72 دۆلار و 80 سەنت مامەڵەی پێوە دەکرێت.
ئەمەش لە کاتێکدا، دوێنێ نرخی هەردوو جۆری نەوتەکە لە برێنت و تێکساس، یەکی دۆلارێک بەرزتربوون لەو نرخەی ئەمڕۆ.
ئاژانسی رۆیتەرز ئاشکرایکردووە، لە مانگی رابردوودا، بەرهەمهێنانی ئۆپێک بە رێژەی 70 هەزار بەرمیلی رۆژانە زیادیکردووە و گەیشتووەتە 27.88 ملیۆن بەرمیل لە رۆژێکدا، کە ئەوەش زیاترە لە فشارەکانی بەرزبوونەوەی نرخەکان کە پەیوەندییان بە نیگەرانیی جیۆپۆڵەتیکی رۆژهەڵاتی ناوەڕاستەوە هەیە.
