بافڵ جەلال تاڵەبانی، سەرۆكی یەكێتیی نیشتمانیی كوردستان لە كەركوك لەگەڵ ژمارەیەك مامۆستا و زانای ئایینی كۆبووەوە.
لە دیدارێكدا كە رەفعەت عەبدوڵا، ئاسۆ مامەند و قوباد تاڵەبانی، ئەندامانی مەكتەبی سیاسی و رێبوار تەها، ئەندامی سەركردایەتی ئامادەبوون، قووڵكردنەوەی تەبایی و پێكەوەژیان، گەشەپێدانی بیری ئاشتی و میانڕەوی گفتوگۆی لەبارەوەكرا.
لەدیدارەكەدا سەرۆك بافڵ جەلال تاڵەبانی رۆڵی مامۆستایانی ئایینی لە هۆشیاركردنەوەی كۆمەڵگا و ئاڕاستەكردنی خەڵك بۆ چاكەكاری بەرزنرخاند و رایگەیاند، تەبایی و پێكەوەژیان بنەمای سیاسەتی یەكێتییە و پشتگیریی هەر هەوڵێكیش دەكەین كە ئامانجی خزمەتكردنی كەركوك و قووڵكردنەوەی برایەتیی نێوان هەموو نەتەوە و پێكهاتە جیاوازەكانی شارەكە بێت.
لە درێژەی دیدارەكەدا گفتوگۆیەكی كراوە لەبارەی خزمەتكردنی كەركوك، چارەسەركردنی كێشە و گرفتەكانی خەڵك و گرنگیدان بە كەلتووری ئاشتی و پێكەوەژیان گفتوگۆیان لەبارەوەكرا و لەبەرامبەر پێشنیارەكاندا سەرۆك بافڵ وتی، “خزمەتكردنی كەركوك و بەدەمەوەچوونی داواكاریی خەڵكە دڵسۆزەكەی بە ئەركی خۆمان دەزانین، ئێمە قەرزاری دڵسۆزی و ئازایەتیی كەركوكییە سەربەرزەكانین و هەرچییەك بكەین ناكاتە ئەو قوربانییەی لەپێناو كوردستان و یەكێتیدا بەخشیوویانە”.
