لە دوو ناوچەی جیاواز، پێنج کەس بە تۆمەتی راوکردنی باڵندەی کێوی دەستگیرکران، چەند کەرەستەیەکی راوکردنیش دەستیان بەسەرداگیرا.
بەڕێوەبەرایەتیی پۆلیسی دارستان و ژینگەی سلێمانی بڵاویکردەوە، لە ئەنجامی دەرچوونی مەفرەزەیەكی بنکەی پۆلیسی دارستانی ئاغجەلەر بۆ سنووری گوندی ( تەوەکەڵ ) سێ هاووڵاتی بە تۆمەتی ڕاوکردن دەستگیر کران کە سێ باڵندەی کێوی (سوێسکە)یان ڕاوکردبوو ، هەروەها دەست بەسەر دوو لایتی دەستی و تۆڕێک و یەک چەقۆ داگیرا.
باس لەوەش دەکات، لە هەمان کاتدا لە سنووری گوندی ( لەکاو )ی سەر بە ناحیەی تەکیە لە لایەن کارمەندانی بنکەی پۆلیسی دارستانی تەکیەوە دوو هاوڵاتی دەستگیرکران کە سەرقاڵی ڕاوی باڵندەی کێوی بوون، هەروەها دەست بەسەر ئۆتۆمبێلێك و یەک لایتدا گیرا.
بەڕێوەبەرایەتییەکە دەڵێت، پەڕاوی لێکۆڵینەوە ڕێکخراوە و بۆ وەرگرتنی ڕێکاری یاسایی ،ڕادەستی دادوەر کراوە .
