ئەندامێكی ئەنجومەنی نوێنەرانی عێراق رایدەگەیەنێت، ئەنجومەنی وەزیران نووسراوێكی ئاراستەی نوێنەرایەتیی حكومەتی هەرێم لە بەغداد كردووە داوای بۆچوونی نوێنەرایەتییەكەی كردووە سەبارەت بە هاوتاكردنی مووچەی زیندانییانی سیاسیی و كەسوكاری شەهیدانی هەرێم لەگەڵ بەغداد.
چرۆ حەمە شەریف ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، پێشتر بە دوو نووسراو كە ئاراستەی سەرۆكایەتیی ئەنجومەنی نوێنەران و ئەنجومەنی وەزیرانی عێراقمان كرد و داوای هاوتاكردن و گواستنەوەی مووچەی زیندانییانی سیاسی و كەسوكاری شەهیدانمان كرد و لە چەند رۆژی رابردوودا بە نووسراو حكومەتی عێراق داوای بۆچوونی نوێنەرایەتیی حكومەتی هەرێمی كردووە سەبارەت بەو پرسە.
راشیگەیاند، لە نووسراوەكەدا داوای بۆچوونی نوێنەرایەتیی حكومەتی هەرێم كراوە و دواتر ئەنجومەنی وەزیرانی عێراق بە نووسراو ئاراستەی ئەنجومەنی نوێنەرانی عێراقی دەكات و ئەگەر حكومەت رەزامەند بێت بە نووسراوەكە ئاراستەی پەرلەمان دەكرێت و دەخرێتە دەنگدانەوە.
