وەزارەتی سامانە سروشتییەکانی هەرێم رایگەیاند، چاوڕوانی پشکی هەرێمن لە نەوتی سپی لەلایەن بەغدادەوە بنێردرێت، بەڵام هەتاکو ئێستا نەگەیشتووە.
وەزارەتی سامانە سروشتییەكانی هەرێم بڵاویکردەوە،” لە رێگەی تیمەكانی بەرێوەبەرایەتیی نەوت و كانزاكانی هەولێر دەست بە دابەشكردنی نەوتی سپی لەناو سەنتەری شاری هەولێر کراوە”.
وەزارەتەکە دەڵێت،”لە چاوەڕوانی ناردنی نەوتی سپی حكومەتی عێراقین و بۆ ئەم مەبەستە چەندین نووسراومان ئاڕاستەی لایەنی پەیوەندار كردووە و لەگەڵ ئەوەش کە وەزارەتی نەوتی عێراق ئامادەباشیان دەربڕیوە، بەڵام تا ئێستا پشكی هەرێم لە نەوتی سپی نەگەیشتووە”.
بەپێی ئاماری وەزارەتەکە، تاکو ئێستا زیاتر لە 116 ملیۆن و 209 لیتر نەوتی سپی بەسەر 581 هەزار خێزان دابەش کراوە.
