وەزارەتی دارایی حکومەتی عێراق دەیەوێت مووچەی مانگی 11 دابەش بکات و بۆ ئەو مەبەستە رێکاری پێویست دەگرێتەبەر.
وەزارەتی دارایی حکومەتی عێراق لە راگەیاندراوێکدا بڵاویکردەوە،” بەشی ژمێریاری لە وەزارەتی دارایی دەستیکردووە بە ڕێکارەکانی دابینکردنی پارەی مووچەی فەرمانبەران بۆ مانگی تشرینی دووەم، دوای تەواوکردنی سەرجەم رێکارەکانی پەیوەست بە پڕۆسەی ڕێکخستنی خەرجییەکان”.
لە راگەیاندراوەکەدا وەزارەتی دارایی حکومەتی عێراق داوا لە سەرجەم یەکەکانی خەرجکردن لە وەزارەت و پارێزگاکان دەکات، پێداچوونەوە بە خەرجییەکاندا بکەن بۆ تەواوکردنی ڕێکارەکانی تەرخانکردنی پارە بە لەبەرچاوگرتنی مەرجە داراییەکانی مانگانە، بۆ ئەوەی مووچەی ئەم مانگە دابەش بکەن.
ئەوە لەکاتێکدایە تا ئێستا لە هەرێمی کوردستان، مووچەی مانگەکانی ئەیلول و تشرینی یەکەم و تشرینی دووەم دابەشنەکراوە و هێشتا روون نییە کەی دابەشدەکرێت.
