سەرۆك كۆماری عێراق رایدەگەیەنێت، پێویستە مووچەی مووچەخۆرانی هەرێمی كوردستان وەك هەموو مووچەخۆرانی دیكەی وڵات دابینبكرێت.
د. لەتیف رەشید سەرۆك كۆماری عێراق لەگەڵ ژمارەیەك لە ئەندامانی ئەنجومەنی نوێنەران و سەرۆكی فراكسیۆنەكانی پەرلەمان و لێپرسراوانی دەوڵەت كۆبووەوە كە فوئاد حسێن وەزیری دەرەوە، خالید شوانی وەزیری داد و نزار ئامێدی وەزیری ژینگەش ئامادەبوون.
لە كۆبوونەوەكەدا، دوایین پێشهاتە ئەمنی و سیاسی و ئابورییەكانی وڵات تاوتوێكران و سەرۆككۆمار ئاماژەیكرد بە گرنگی پاراستنی ئەو دەستكەوتانەی لە بەرجەستەكردنی ئاسایش و سەقامگیری و بەهێزكردنی یەكێتیی نیشتمانی و بەدیهێنانی دادپەروەری كۆمەڵایەتی و كاركردن بۆ دابینكردنی خزمەتگوزاری بۆ هاوڵاتییان لە رێگای سەرخستنی بەرنامە و پرۆژەكانی پەرەپێدان و وەبەرهێنان لە وڵاتدا بەدیهاتوون.
هەروەها سەرۆك کۆمار جەختیكردەوە لەسەر پێویستیی یەكلاییكردنەوەی پشكی هەرێم لە بودجەی گشتی و دابینكردنی مووچەی فەرمانبەرانی هەرێمی كوردستان وەك هەموو فەرمانبەرانی دیكە، لەم چوارچێوەیەشدا كاریگەرییەكانی خەرجنەكردنی مووچەی فەرمانبەرانی هەرێمی لەسەر رەوشی ژیان و ئابوری و باری كۆمەڵایەتی روونكردەوە و ئاماژەی بەوەكرد، كە دابەشنەكردنی مووچە بووە هۆی داخستنی خوێندنگەكان و بێبەشبوونی خوێندكاران لە خوێندن.
