بەهای نەوت تا ڕادەیەك گەشایەوە، هۆكارەكەشی بۆ پەسەندكردنی یاسای پاڵپشتیی دارایی ئەمریكا بۆ ئابوریی وڵاتەكەی دێت لەگەڵ ڕێككەوتنی بازرگانیی نێوان ئەوروپا و بەریتانیا.
لەگەڵ بڵاوكردنەوەی ئەم هەواڵە، بەهای نەوتی خاوی برێنت 51 دۆلار و 24 سەنتە، بەوەش ئەمڕۆ سێشەممە 29ی كانونی یەكەم، بەهاكەی بە ڕێژەی 0.87% بەرزبووەتەوە.
بەهای نەوتی خاوی ڕۆژئاوای تێكساس (ئەمریكا) یەك بەرمیلی 48 دۆلارە، كە 0.80% بەرزبوونەوەی بەخۆیەوە بینیوە.
سەبارەت بە هۆكاری بەرزبوونەوەی بەهای نەوتی خاو لە جیهان، ئاژانسی ڕۆیتەرز ئاماژەی بەوەكردووە، پەسەندكردنی یاسای پاڵپشتیی دارایی بۆ ئابوریی ئەمریكا كە بەهۆی كۆرۆناوە زیانی بەركەوتبوو هۆكارێكی بەرزبوونەوەی بەهای نەوتە.
هەروەها هۆكارێكی دیكەش گەڕێندراوەتەوە بۆ، پەسەندكردنی ڕێككەوتنی ئاڵوگۆڕی بازرگانیی نێوان بەریتانیا و یەكێتیی ئەوروپا.
