ناسا رایدەگەیەنێت، توانیویانە ئۆکسجین بۆ هەناسەدان لە بەرگەهەوای مەریخدا بەشێوەیەکی بەردەوام دروستبکەن و سەرکەوتوو بوون.
بەپێی راپۆرتێک کە ماڵپەڕی ساینس ئالێرت بڵاویکردووەتەوە، ناسا توانیویەتی لە رێگەی ئامرازێکەوە گەردیلەکانی هەوای مەریخ بشکێنێت کە لەڕێگەیەوە ئۆکسجینێکی کەم و بەردەوام دروست دەکات.
پامێلا میلرۆی، جێگری بەڕێوەبەری ئاژانسەکە دەڵێت، “ئەوە کارێکی سەرنجڕاکێشە کە دەتوانرێت ئۆکسجین لە بەرگەهەوای مەریخەوە دەربهێنرێت، ئەو کارە دەتوانێت یارمەتیدەربێت لە دابینکردنی هەوا بۆ هەناسەدان، تەنانەت دەتوانێت سووتەمەنی مووشەکی بۆ کەشتیوانەکانی داهاتوو دابینبکات”.
ئەو ئامرازە کە ناوی مۆکسییە 16 پشکنینی جۆراوجۆری ئەنجامداوە بۆ بەرهەمهێنانی 122 گرام ئۆکسجین، ئەمەش نزیکەی چوار کاتژمێر ئۆکسجین بۆ مرۆڤ دابیندەکات، ناسا ئەوەشی خستۆتەڕوو، نیشتنەوەی چوار کەشتیوانی لەسەر رووی مەریخ پێویستی بە نزیکەی حەوت تۆن سووتەمەنی بۆ کەشتییەکان دەبێت، بێجگە لە 25 تۆن ئۆکسجین بۆ کەشتیوانەکان.
