بەڕێوەبەری نەخۆشخانەی منداڵان لە سلێمانی رایدەگەیەنێت، رۆژانە 300 بۆ 350 حاڵەتی سكچوون و رشانەوە لەناو منداڵان لە نەخۆشخانەكەمان تۆماردەكرێن و لەو ژمارەیەش 60 بۆ 70 حاڵەتی لە نەخۆشخانە داخڵدەكرێن و چارەسەر وەردەگرن.
د. پشدەر عەبدوڵا بەڕێوەبەری نەخۆشخانەی منداڵان لە سلێمانی لە لێدوانێكدا بە تۆڕی میدیایی ئێستای راگەیاند، تائێستا 10 حاڵەتی تووشبوون بە نەخۆشیی كۆلێرا تۆماركراوە كە لەنێو تووشبووەكاندا یەكێكیان منداڵێكە و ئەگەر بەشێك لەو منداڵانەی دووچاری سكچوون و رشانەوە بوون پشكنینیان بۆ بكرێت بە كۆلێرا تۆماردەكرێن.
ئاماژەی بۆ ئەوەش كرد، “لە ئێستادا رۆژانە 300 بۆ 350 حاڵەتی سكچوون و رشانەوە لەناو منداڵان لە نەخۆشخانەی منداڵان لە شاری سلێمانی تۆماردەكرێن و هەموو رێوشوێنێكی پێویستمان بۆ پاراستنی سەلامەتیی منداڵان پەیڕەوكردووە”.
