دیداری سلێمانی بۆ كەلتوور و هونەر، هەرەوەزێكی خۆبەخش و قازانج نەویستە، كۆمەڵێ هونەردۆست بەشێوەی خۆبەخش لەم چوارچێوەیەدا هاوكارن، دیداری سلێمانی بۆ كەلتوور و هونەر لە ئێوارانی 8 بۆ 11 ی ئەیلول فێستیڤاڵی سلێمانی (ئاوازی گەلان لە هەواری شار) لەسەر شانۆی ڕۆمانی سازدەكات.
ئاماژە بۆ ئەوەش كراوە، فێستیڤاڵی سلێمانی دەبێتە یەكەمین فێستیڤاڵی نێودەوڵەتیی میوزیك و گۆرانی لە كوردستاندا، كە بە بەشداریی گۆرانی بێژ و گروپە میوزیكییە بەناوبانگەكانی كورد و ناوچەكە لە شاری سلێمانیدا بەڕێوەدەچێت.
لەم فیستڤاڵەدا گروپی كیژانی سلێمانی و تیپی مۆسیقای سلیمانی، بە هاوكاریی گۆرانی بێژە ناسراوەكانی كورد و هەروەها گروپی نیشتمانیی عێراق و مەقامات و چالغی عێراق بەشدارن هاوكات هونەرمەندان و گروپە میوزیكیەكانی وەك، راستاگ و میراز و تەكات و كچانی هەرای خوراسان، هونەرمەدانی ناودار عەلی رەزا قوربانی، عەلیم قاسیمۆف و فرغانە قاسیمۆف، پەروین چاكار و گروپی هەژار زەهاوی و چەندین هونەرمەندی میوزسیانی ناودار و داهێنەری گەورەی ناوچەكە بەشدارن لە یەكەمین فێستڤاڵی سلێمانیدا.
ئەمە بۆ یەكەمینجارە، كە ئەم هونەرمەند و گروپە میوزیكییە ناودار و داهێنەرانە لە یەك فێستیڤاڵدا كۆببنەوە.
یەكەمین فێستیڤاڵی ئاوازی گەلان لە هەواری شار لە ئاستێكی ناوازە و شایستە لە سلێمانی دەبێتە خاڵی بەستنەوەی كەلتوورە جیاوازەكان و باوەش بە ئاوازی ڕەسەنی كورد و گەلانی تردا دەكاتەوە لە سەر شانۆی ڕۆمانی لە (ھەواری شار)دا، بێگومان ئاوازی كوردی و گەلانی ناوچەكە پەیامی پێكەوەژیان و مرۆڤدۆستی بۆ گەلی كورد و سەرجەم نەتەوەكانی عێراق و ناوچەكە پەخشدەكات.
دیداری سلێمانی بۆ كەلتوور و هونەر، پرشنگی ئاواز و گۆرانییەكانی، لە شاری سلێمانییەوە بۆ جیهان پەخشدەكات.
