بنەماڵەی ئەو کەسەی شەوی رابردوو لە ماڵەکەی خۆیدا بە کوژراوی دۆزرایەوە لە گەڕەکی کازیوەی شاری سلێمانی، روونکردنەوەیەکیان لەبارەی هۆکاری کوژران و چۆنێتییەکەی بڵاوکردەوە.
بەپێی روونکردنەوەی بنەماڵەی ئەو هاوڵاتییە، رووداوەکە شەوی چوارشەممە روویداوە و کەسانێک بە مەبەستی دزیکردن هەڵیانکوتاوەتە سەر ماڵی (عەدنان مستەفا) و تەنها خۆی لە ماڵەوە بووە.
برازایەکی ئەو هاوڵاتییە کوژراوە بەناوی بنەماڵەکەوە روونکردنەوەکەی بڵاوکردووەتەوە دەڵێت، “ئەوانەی بەمەبەستی دزیکردن چوونەتە ئەوێ سەرەتا ماممیان کوشتووە و دواتر ماڵەکەیان تاڵانکردووە”.
باس لەوەدەکات کە لەبارەی رووداوەکەوە دەنگۆی ناڕاست بڵاوکراوەتەوە و دەڵێت، “بەداخەوە دەنگۆی زۆر ناڕاست لەم بارەیەوە بڵاوکراوەتەوە لەلایەن خەڵکەوە کە بە چاوی خۆیان رووداوەکەیان نەدیوە گوایە خوانەخواستە مامۆژنی ئازیزم ھەستاوە بە ئەنجامدانی ئەم کارە”.
راشیگەیاندووە کە ئەو دەنگۆیانە بەتەواوی لەلایەن بنەماڵەکەیانەوە رەتدەکەنەوە و هیچ بنەمایەکی راست و دروستی نییە.
